KAWLLAM ZOTNA (January 6, 1986)
Ka nu’hong nutsiat teh, ka nupa un naukem ing lah beita a, hi khamtungah losawh singpuak lo tawh kinungta lo ing ahih manin, Kawl lamah kikhin in muhtawm zontawm tawh nuntakna zong leng Topa’n hong puksi sak samlo ing ci in ka nu’ san ah pai in, kam vaisa-in, situi luang kawmin thupha ka nget khit teh, January 6, 1986 ni in hong it u le nau teng mah in, Kawllam Tahan ah hong sasuk uh a, Kawllam a tung ka suak hi.
Kawl ka tun zawh in zong Theizang Pawlpi kum khat sung mah ka van lai hi. Damlohna tuatuam ka neih manin, ka kingen a, 31st May, 1987 in ka tawp leleu hi.
MULAI PAWLPIKEM SIA-IN HONG LA (1.5.1987)
Kei’ ngimna-ah, Kawl tungsuk leng Pasian’ na sem loin nuntak seih na’ng lampi dang khat zong tong ci a ka ngaihsut ahi hi.
Ciingtaaklopi Topa in a nasem ingin hong deih lai ahi tang am, ni khat, Tahan Pastor a sem Rev. Awn Khan Pau in ‘Munlai Pawlpi in Sia nei nailo ahih manin, amau hong deih nakleh nial lo in na sep kul ing hi, hong ci ngei hi. Tu tawh kizomin, zingsang khat, Pawlpi President Upa Luan Za Kham, Upa Vum Za Nang leh Upa Thual Do te hong pai in nang na ut leh kei-u Pawlpi in Sia sem ing in ka lungkim khin zo uh hi, hong cih ciangin, ka kicin loh hangin, Topa’ hong deihsakna ahih song leh, ci in ka sang miaimuai hi.
Sang khin zo ka hih manin June 1, 1987 ni pen Munlai Tuiphum Pawlpi kem Sia khat-a hong kiciapteh ni ahi hi.
Munlai Pawlpi in sasum Ks.300/- hong pia a, kei leh ka zi ka tate’ nek le dawn, silh le teen hong nguan ahih manin, kei Pawlpikem Sia hilozaw-in, Munlai Pawlpi in kei uh innkuan hong kem ci leng, ki khiallo zaw ing hi, ka ci ngei hi.
Mi’n hong phawk khak kim loh hangin pasel-tangah khat ka hihna tawh hong kem hong en kha Munlai Pawlpi pen Lai Siangtho tawh kituakin nungta kha ahih man tuni dongin kiamzawlo in a khangto lam a suak zong kei hong kep man uh hi taw, ci in ka ummawh hi.
1988 kum ciangin Pawlpite’n a zuminn lamna vuah hong omsakin, Tahan a ka inn nusia in tawm vei sung ka om uh hi. Ahi zongin, cidam seilo, papite’n ‘ci nana sih phut’ acih hawng hi kha leng, mualpho mamah ing I hih manin, kikhin in I sih le zong eima inn eima lo ah si le’ng nuamzaw ing hi, ci in lai a ka nget loh hangin, Pawlpi Upate’ tungah ka ngetna tawh September 9, 1990 ni in Tahan inn zuanin, Tahan pan a kisam bangin van napi ing in, pawlkhat in hong telkhial phial uh hi.
February 17, 1990 ni in tapa khat ka nei uh a, a nulai Nem Khan Vung dapsak in ‘Vung Khan Tuang’ ka phuak uh hi.
Rev.Dr.Samuel Nang Khan Do' Nu le Pa Phawkna Mualsuang.
Copy Right©Cosmos International University Press
laimai 28